Дифференциалдык теңдемелер жаратылышта кездешүүчү кыймылдарды, б. а. нерсенин абалынын өзгөрүшүн, өзгөрүү ылдамдыгын жана ылдамдануусун изилдөөдө колдонулат. Жогорку билимдүү кесипкөй адистерди даярдоодо университеттердин окутуу программаларына ылайык дифференциалдык теңдемелер өз алдынча предмет же жогорку математиканын курамындагы бөлүм катары окутулат. Бул окуу куралында дифференциалдык теңдемелер теориясынын сызыктуу дифференциалдык теңдемелер, сызыктуу эмес дифференциалдык теңдемелер жана алардын системалары, сапат теориясынын негизги түшүнүктөрү сыяктуу негизги бөлүмдөрү камтылган жана ал бакалавр, магистр академиялык даражаларын ыйгаруучу жогорку окуу жайлардын окутуу программаларына ылайыкталып жазылган.